لأنتزعن ضحكاتكم رغم أنف كل هذا النكد - التوقيع : متفائل

**اسيره الهوى**

الزملاء الأعزاء أعضاء المنتدى

طبعا الأحوال و الحمد لله مش محتاجه تعليق

بس مين المسئول عن كده - و متقولش و انا مالى
بيتهيئ لى ان أحنا برضه مشتركين فى الجريمه
أكيد مشاركاتنا بتأثر علينا سلبيا و بدل ما ندخل نفرفش لأ - نتنكد أكتر

طيب ليه الجو الوحش ده - هوه كله كده

و فجأه أكتشفت ان النت زى ما كله أخبار وحشه فيه ناس لسه بتضحك طيب ازاى و ليه رغم كل القرف و العيشه اللى مايعلم بيها الا ربنا

قال ايه فيه حاجه أسمها نكت و مقالات فكاهيه و كتب ساخره
قمه الضحك وسط بحور من الدموع - يبقى لسه فيه أمل حتى لو مختفى
سمعتوا عن أحمد رجب و محمد عفيفى و عمر طاهر و الجاحظ و جحا و ...و .... الخ

الناس دى بيقولوا انهم بيقدروا يضحكوك رغم انفك و همه ميضحكوش أبدا
طيب ما نييجى نحاول - مجرد 10 دقايق قبل ما نشوف الأكتئاب مجرد حتى نبتسم علشان نقدر نكمل الطريق

ندخل على اى محرك بحث زى جوجل و لا ياهو و نكتب
عايزين نضحك - ضحكه - نكته - ابتسامه
نحاول حتى و أكيد النتيجه هتبقى تغيير و لو بطيئ بس للأحسن أن شاء الله

كل واحد يحاول يبتسم - اما بقى لو ضحك يبقى من حقنا عليه يضحكنا معاه و يكسب فينا ثواب
يجيب اى حاجه أو لينك لكتاب أو مقال
و بما ان عددنا مش قليل يبقى نعمل الموضوع و يكبر و يبقى ركن الأبتسامات

أيه رأيكم نجرب على الأقل - لعل و عسى
يمكن لما نروح الشغل تانى يوم نفتكر ان لسه فيه مكان فى حياتنا لأبتسامه و لو خفيفه
بالتأكيد الأبتسامه دى هتخفف توتر العمل و العيشه

هل ستحاولون معى فتح موضوع قديم كنت أحبه

يوم أنشأت هذا الموضوع فى منتدى للأطباء فقط (المأسوف على شبابه) عمل 15 صفحه فى 4 ساعات فقط - و قتها أدركت كم نحب ان نبتسم و أسميته

بنك الدم الخفيف - مجرد محاوله (بدل ما يجرالنا حاجه وحشه )

فسأحاول و أرى و متأكد اننى أسمع ضحكات فى الصدور و أبتسامات على الوجوه - و سأنتزعها منكم

رغم أنف كل هذا النكد

التوقيع : متفائل

_________________

[img]